Coronavirus: seus totus in zona arrùbia

S’Itàlia est blindada. Su guvernu at nau ca totu s’Itàlia est “zona arrùbia” po frimai s’epidemia de su coronavirus. Serrant totus is negotzius, is tzilleris, is ristorantis, is albergus, is parruchieris, is servitzius de mensa. Industrias e fabbricas ant a sighì is atividadis intzoru a patu chi pongant in siguresa is dipendentis. Pagus ant a depi essi is tramudamentus de sa genti foras de si spostai po fai sa spesa o andai a sa potecaria. Po cantu pertocat sa Sardigna: sunt undixi mila is pressonis lòmpias de su Nord chi cun sa piataforma informatica aparixada de sa Regioni si sunt denuntziaus. Sa Sardigna est sa prima po lompidas e custu non si lassat aici prexaus. Parit chi is nùmerus siant a comenti e cussus de s’istadi in is mesis de argiolas e austu. S’obligu de si registrai, dd’arremonaus, est po totus cussus chi sunt lòmpius in Sardigna a inghitzai de su 24 de friaxu partendi de is zonas arrùbias, impai a s’isolamentu po catodixi dies. Chini non si registrada podit arrui in contraventzioni. In su database lompint fintzas is elencus de is passegeris chi sunt lompendi in Sardigna passendi de is aeroportus o de is portus. S’ìsula arrisurtat controllada e protègia, intra is portus e is aeroportus difatis nci sunt 36 termolaser e 8 termoscanner e sa bendida de is mascherinas in Sardigna est lòmpia a 16.000 unidadis.