Po su partidu de Salvini in Sardigna torrat su deputau Eugenio Zoffili. Sa Lega est acusendi fortzis su corpu, cunfroma a is ùrtimus sondàgius de is eletzionis europeas a oi at pèrdiu su 9% e su Pd, mancai pagu, est acostendi. Chi siat po cussu chi Matteo Salvini torrat a commissariai su partidu in Sardigna? De aiseu sa nova chi Zoffili pigat su postu de Guido De Martini, òmini de 64 annus, deputau de su 2018, oculista e maidu de sa segretària de s’assessori regionali a sa sanidadi Mario Nieddu. De Martini fiat coordinadori de sa Lega in Sardigna sceti de su mesi de argiolas 2019 po unu traballu mannu e longu de fai impai a su consilleri regionali Dario Giagoni.
Matteo Salvini at torrau gràtzias a De Martini e at fatu sci ca su deputau sardu de immò innantis at a fai parti de sa segreteria federali, organismu de sa Lega abui setzint prus de cincuanta pressonis, abarrat de acrarai
cali at a essi su rollu de De Martini, si at a tenni deretu de votu o at a podi sceti ascurtai. Zoffili torrat duncas in Sardigna, prus pagu de un’annu fait aiat saludau s’ìsula po andai a fai su commissàriu regionali in Emilia Romagna e sustenni sa candidadura a guvernadora de Lucia Borgonzoni chi apustis aiat pèrdiu contra a Stefano Bonaccini de su Pd.
