Primu de maiu. In su calendàriu agataus Santu Giusepi, carpentieri, maistu de linna, e duncas, po custu, patronu de su mundu de su traballu. In Casteddu est sa die de Sant’Efis. Ma ocannu no at a essi a comenti de sèmpiri.
In 364 annus non fiat mai acontèssiu, nimancu in su 1943, s’annu de su bombardamentu fintzas in Casteddu, chi non nci fessit sa bessida de Sant’Efis. Su santu martiri gloriosu chi nd’aiat campau Casteddu de sa pesti in s’annu 1657. Ocannu, in custa die, non nci at a essi peruna Missa e duncas at a mancai fitzas cussa prucessioni, chi prus de una prucessioni est bessia una sfilada de costumus. Un’abàntidu de is traditzionis e de is coloris de totu s’ìsula. Impai a essi sa prucessioni religiosa prus longa de totu s’Itàlia, e fortzis de totu s’Europa, cun prus de sessanta chilometrus, fatus a pei, in cuatru dies.
Pusticras, su 3 de maiu, invecis, cun unu mezu militari, de sa Cruxi àrrubia italiana, sa stàtua at a essi tramudada a Nora, sa tzitadi abui aiant mortu a Efis, inguni, chene partecipatzioni de pòpulu, ant a fai sa Missa, a pustis, in sa matessi die, su mezu militari nci at a torrai sa stàtua a sa crèsia de Stampace, in Casteddu. Duncas perunu afestamentu, sceti su tres nci at essi una manifestatzioni chi no at a tenni nudda de is numerus, coloris e fintzas de is economias chi sa festa de Sant’Efis teniat in custus annus passaus. Podit essi una torrada a sa fidi autèntica de una borta? Sa matessi fidi chi aiat pregontau a su santu de ndi campai Casteddu de sa pesti, e chi in die de oi pedi su miràculu de si ndi campai de su Covid-19.
Guido Cadoni
