Su Coronavirus amostat is dificultadis de su sistema sanitàriu sardu giai atzopiau, ma s’emergentza de su Covid-19 dd’at sbregungiu de prus e in onnia logu. No est cosa de oi, mancu de aiseu! Is guvernus de tzentru dereta e de tzentru manca ant sighiu in un’àndala chi at portau de siguru a su rispàrmiu (est cussu chi totus bollint), ma chi in die de oi narat a totus chi no abompiat is abisùngius de sa populatzioni.
Cun sa punna de donnai siguresa sa sanidadi sarda est lòmpia fintzas a bendi su chi non tennit: lunis 17 de martzu passau in s’Unione Sarda eus lìgiu ca sa Regioni aiat ordinau de sa dita Tema Ricerche de Bologna migliaias de kit de test lestrus, chi depiant permiti de otenni rispustas in dexi minutus, sa lòmpida depiat acontèssi in una dexina de dies. Fiat una dichiaratzioni de s’assessori a sa sanidadi Mario Nieddu. Una noa de importu, duncas po agatai cussus chi sunt is portadoris sannus e prevenni is cuntàgius. Sa matessi Unione Sarda, domingu 22 perou fadiat sci ca cussus tamponis sa Regioni non ddus aiat mai ordinaus, fiat totu una faua. Ma s’assessori Nieddu narat ca est berus, perunu ordini est acontèssiu, antzis sa Regioni si fiat frimada innantis de ordinai, poita is tamponis non fiant validaus e ca s’assessorau a sa sanidadi fiat in cuntatu cun un’àtera dita chi podiat donai una validatzioni mellus. Sa dichiaratzioni de Mario Nieddu est lòmpia a is origas de Tema Ricerca chi no at tentu agradèsciu is fueddus de s’assessori, fadendi sci, intra sa legali rapresentanti, ca perunu òrdini fiat lòmpiu de sa Sardigna e in prus ca s’aina produsia de Tema Ricerca arrispundit a ònnia tipu de certificatzioni. E ant fatu sci ca su fatu at a acabbai in tribunali. In custu tempus diaderus fadiat a ndi fai de mancu! Martis 24 de martzu is Progressistas, LeU e Movimento Cinquestelle pregontant a su governadori Solinas sa nòmina de unu Commissàriu regionali po s’emergentza Covid-19 e, in su matessi tempus, pregontant de nci bogai s’assessori a sa Sanidadi Mario Nieddu. Su Pd, invecis, at fatu sa proposta de aparixai un’organismu fatu de un epidemiologu, unu virologu e un’espertu de medicina de emergentza. Ma non is dimissionis de s’assessori Nieddu. Barrancus a pitzus de barrancus duncas po sa sanidadi sarda chi sèmpiri de prus est amostendi de no abompiai su passu.
In s’asienda ospedaliera universitària de Tatari nodia po su nùmeru de is contàgius e po cussu, dd’arremonaus nc’est un’inchiesta de sa Procura, is barrancus sunt medas, sa Procura non at pòtziu lassai a perdi unu nùmeru aici artu de contàgius chi pertocat prus che totu is sanitàrius. Antzis sa Sardigna si ndi stallat, de printzìpiu de s’emergentza Covid, po su nùmeru de is sanitàrius positivus a su virus: 133, paris a su 27%. In prus su diretori generali de s’AOU de Tatari, cussu sanitàriu e cussu amministrativu, Nicolò Orrù, Bruno Contu e Chiara Seazzu decadint e si ndi andant chene chescius, ma non sunt prexaus. Su guvernadori Solinas ant nomenau Giovanni Soro commissàriu straordinàriu. Po s’ex diretori generali Nicolò Orrù est lòmpia sa proposta de sa diretzioni sanitària, ma Orrù at torrau gràtzias a Solinas e at torrau ca nò. Is tres si ndi andat nendi sceti ca lassant unu spidali chi funtzionat. At a essi.
Ònnia ospìtziu, impai a is residèntzias sanitàrias assistias sunt barrancus mannus po is comunidadis e is sìndigus de is biddas, sa crònaca de Seddori e de Bitti fueddat a craru. Non seus bellus a amparai iaius nostrus!
E candu lompi sa cunfrima ca su Puntu Nascidas at a abarrai in Igrèsias in su spidali CTO (sa punna de sa Regioni fiat a nci dda tramudai, po su tempus de su Coronavirus, a Casteddu) e sa strutura d’emergentza po is infetzionis Covid-19 at a essi agatada in Igrèsias, parrit in su spidali Santa Barbara, arremonaus ca sa batalla at abisungiau de dies e de s’impignu de bintiduus sìndigus a pitzus de bintitres e de is polìticus de su territòriu chi ant biu sa possibilidadi de perdi po sèmpiri su Puntu Nascidas in su Sulcis, in is interis in s’ìsula de Sa Madalena una pipia no est nàscia. Sa mama a s’acabbu de sa gravidantza at tentu unu problema, ma in s’ìsula su puntu de is nascidas, cussu de su spidali Paolo Merlo est serrau, matessi cosa po sa sala operatòria. Duncas est partiu un’elicòteru, ma non su prus acanta, cussu de Terranoa non podiat partì po nexi de sa posidividadi de unu pilota, e duncas est tocau a abetai cussu de s’Alighera. Fortzis totu custu tempus fiat serbiu a fai nasci sa pipia.
Su coronavirus, est berus, est lòmpiu de suncunas, e emergentza non bollit nai vida ordinària, perou, at a essi abbellu a imparai de sa stòria. Sa sanidadi sarda, cun cali chi siat assessori, de manca o de dereta, abisungiat de una cura bona, de torrai a poni s’òmini innantis de is nùmerus. In Carloforti, in Sa Madalena, in Sorgono, in Muravera, in Isili tenneus abisùngiu de spidalis, e chi su rispàrmiu nci depit essi, si podit fai a pitzus de àteras cosas.
