S’epidemia de su coronavirus non frimat s’universidadi de Casteddu. Po mori de su traballu fatu in custas dies passadas de sa die de cras, mercuis 18 de martzu, s’universidadi at a podi impreai sa didàtica telematica po lompi a totus is studentis frimus in is domus intzoru. S’atividadi at a essi intra aulas virtualis in una piataforma ùnica. A ddu fai sci est sa retori e totu, sa professora Maria del Zompo. Non ci at a essi totu in sa die de cras, po immò nci ant a essi is cursus chi fiant giai in modalidadi e-learning: Scièntzias de sa Comunicatzioni, Economia e Gestioni Aziendali, Ingegneria Elètrica, Eletrònica e Informàtica, Benis Culturalis, Amministratzioni e Organizatzioni.
De cras inghitzat sa fase nùmeru tres chi at a portai, abellu, abellu a totu is insignamentus. S’at a inghitzai de sa facultadi de Scientzias e de sa facultadi de Biologia e de Farmacia. Apustis, s’at a sighì cun sa facultadi de Ingegneria e Architetura e sa facultadi di Scièntzias Economicas, Giuridicas, Politicas; apustis at a essi sa borta de sa Facultadi de Medicina e sa facultadi de Stùdius Umanìsticus. Ònnia studenti at a tenni unu coxi po brintai in su sistema.
Si fueddat fintzas de esàminis in modalidadi telematica, ma mancat ancora s’ufitzialidadi. Matessi cosa po is laureas.
